|
 Na sèptèmber 2011 Kòrsou ta anfitrion di un kantidat kresiente di aktividat. Naturalmente nos ta na haltura di e grandioso Curaçao North Sea Festival ku un kantidat grandi di artistanan impreshonante. Banda di esei lo tin tambe un festival di pintura, yamá Plein Art Curaçao, ku lo reuní un kantidat di por lo ménos 40 pintor ku lo bin pinta bunitesa di Kòrsou.
Awor nos por añadí un aktividat internashonal mas ku e konferensha di TEDx ku lo tuma lugá na Kòrsou na final di e festival di jazz. TEDx ta un konferensha derivá di TED.
TED ta para pa Technology Entertainment and Design, i ta para pa un sèt di konferensha ku ta organisá rònt mundu ku e propósito pa diseminá idea ku ta bal la pena kompartí .
TED ta propiedat di Sapling Foundation, un organisashon non-profit, establesé na 1996 pa Chris Anderson. Meta prinsipal di e fundashon ta pa plama idea bon.
Pa hasi esaki nan ta ofresé un tarima pa e pensadónan mas sabí, e vishonarionan mas grandi i e maestronan di skol mas inspirativo di mundu por presentá nan ideanan. Ku esaki nan ke eksponé mundu henter na e ideanan aki ku e fin pa krea un komprendementu i un deseo pa kontribuí na solushon di e problemanan ku mundu ta enfrentá.
Núkleo di e meta aki ta e konvikshon ku no tin forsa mas grandi pa kambia mundu ku un idea poderoso. Konsiderá lo siguiente:
- bo por krea un idea uzando simplemente bo imaginashon;
- un idea no ta pisa nada;
- bo por transmitié rònt mundu ku spit di lus, kostando kasi nada;
- sinembargo un bon idea, risibí pa un mente prepará por tin un impakto ekstraordinario;
- e por kambia persepshon di e mente ei pa loke ta akontesé na mundu;
- e por kambia komportashon di e doño di e mente e pa semper;
- e por pone mente ei sigui transmití e mesun idea pa otronan.
Technology Entertainment and Design (TED) a keda fundá na 1984 komo un evento pa un biaha so. Su éksito a pone organisadónan rekonsiderá i nan a disidí pa kombertié den un evento anual, kuminsando na aña 1990, na Monterey na California.
E tópikonan ta hopi mas variá ku ántes den e kuadro di siensia i kultura. Inisialmente e énfasis tabata riba tópikonan ku tin di haber ku teknologia i diseño, ya ku nan tabata operá serca di Silicone Valley. Awendia e eventonan ta tuma lugá na Long Beach i Palm Springs na Merka. Pero tambe na siudatnan rònt Europa, i Asia. E presentashonnan ta aksesibel mundialmente pa tur hende ku un konekshon di Internèt.
E oradónan ta haña un máksimo di 18 minüt pa presentá nan idea na e manera mas inovativo i interesante posibel. Hendenan ku a presentá idea na TED ta inkluí Bill Clinton, Jane Goodall, Malcolm Gladwell, Al Gore, Gordon Brown, Richard Dawkins, Bill Gates, edukador Salman Khan, fundadónan di Google Larry Page i Sergey Brin, i diferente ganadó di premio Nobel.
Chris Anderson, e hòmber responsabel pa TED a pone mas ku 900 presentashon online. Ya kaba e videonan a wòrdu mirá mas ku 400 mion biaha. Unabes bos deskubrí TED ta difísil pa bo lag’é lòs.
 Dennis Jilesen ta e invitado di e edishon di dia 28 di mei di Papia Digital. E ta presidente di e organisashon ku ta tras di e konferensha TEDx Curaçao. Nos ta kombersá ku n’e tokante un gran kantidat di tópiko, ku énfasis riba TEDx na Kòrsou.
Mas informashon
- E website di TED ku mas ku 950 presentashon riba video.
- Algun TED Talk rekomendá:
Si tin pregunta òf komentario:
Fabor tuma kontakto ku nos via di e-mail, òf bishita nos página riba Facebook. |
